भारतबाट नक्कली नोट लिएर नेपाल आएका दुई जनालाई प्रहरीले वीरगन्जबाट पक्राउ गरेको छ ।भारतीय नम्बर प्लेटको स्कार्पियो गाडीमा सवार भइ भारतबाट नेपाल प्रवेश गरेका दुई जनालाई प्रहरीले नेपाली एक हजार र पाँच सय दरका नक्कली नोटसहित वीरगन्ज १६ बाट पक्राउ गरेको हो ।
पक्राउ पर्नेहरुमा सर्लाहीको गोडौता नगरपालिका वडा नंबर १२ मधुवनी गाँउ घर भएका ३४ वर्षिय आनन्दबर्धन सिंह र बाराको परवानीपुर गाउँपालिका वडा नंबर ३ घर भएका ३६ वर्षिय ओमप्रकाश साह रहेका छन् ।
उनिहरुको साथबाट नेपाली एक हजार दरको नक्कली नोट ४५० थान र पाँच सय दरको नक्कली नोट ७२ थान गरी ४ लाख ८६ हजार रुपैया बरामद भएको पर्साका प्रहरी उपरीक्षक कोमल शाहले जानकारी दिए ।
विशेष सुराकीको आधारमा खटिएको प्रहरी टोलीले वीरगन्ज १६ स्थित ४० फिटे सडकमा बीआर ०१ पिजि ६५७७ नम्बरको स्कार्पियो गाडी रोकेर चेकजाँच गरेको थियो । त्यसक्रममा स्कार्पियोभित्र रहेको सेतो रंगको प्लास्टिकको झोलाबाट उक्त परिमाणको नक्कली नोट बरामद भएको प्रहरी उपरीक्षक शाहले जानकारी दिए । उनिहरुको साथबाट सक्कली नेपाली दुई लाख रुपैया पनि बरामद भएको प्रहरीले जनाएको छ ।
नक्कली नोटसहित पक्राउ परेका दुवै जनालाई प्रहरी हिरासतमा राखेर थप अनुसन्धान भइरहेको शाहले जानकारी दिए ।
